ادهم عادل
گالولي العمر
خلصان
لا تحلم…
وفهموني الفرح بالعيد
محصور بذبيحه ودم…
حرام تهد جديلة شوگ
عيش سنينك ملثم..
گالولي العمر خلصان
وبنادم سوالف غيم
ما تدري اعلى غفله
ولنّك موشل..
تاليتك بحفره ونار..
عاند روحك شمتريد
صحبة روحك تفشل..
يوليدي القدر مكتوب
بالك تكفر وتسأل..
ودرب الخيرلازم
جف يگودك بيه
صعبه لوحدك تندل.
عل الفطره البشر موزين
وعل النيه الورد يذبل..
علموني اصلي شلون
بس من ادعي
ما فهموني ادعي بشوگ
لو خايف واريد انهزم من النار
لو طامع بجنه وگاعد اتوسل..
ليش الدنيا حصروها بقيامه ونار..
ليش النثيه رجعت تندفن
ويطمها صم افكار..
ليش اليختلف منبوذ
واليعترض كافر
واليفكر عيب والصفنات وصمة عار..
من كثر الوعد والخوف والتهديد
خلوني احس الدين فكرة ثار
صعبه الدين من تحسه فكرة ثار
صعبه الدين من ينحسب جنه ونار
صعبه الدين من ينفهم طول بثوب,,,
وصعبه الشرف من ينقاس فتحه ببوب,,,
من تحلم تحس بذنوب,,,
من اتوب من الخير
ما تعرف عليش اتوب؟؟
ربك من خلقنه ارواح حتى انطير….
ومن خله الكلوب الوان ,,,
حتى نعيش نلون بلون ويه الغير..
وهذا العقل ما ينكاد بابره وخيط
هذا العقل للتفكير
للتغير,,للتحرير..
ومن كالو ملاكئته (البشر مو زين)
كلهم( لا … طيني وحيل اعرفه هواي عدهم خير)
وهسه شلون؟؟
هسه شحجو من شافو الجاي يصير؟؟
من شافو الفقره تموت
والكذله الطويله لنثيه بت بيوت
مو بالهوى بعبوه اطير..
من شافو الدين انفهم بالتفجير..
من شافو حسين انفهم بالتطبير
من شافو درب يعكوب مكيود بطواري البير
