مهند العزاوي
شجابك عل شمس وانتة الدفو يجوّيك
صعبة تشيل راسك وانت راسك طاخ
اذبحني اعلة كيفك وبكّفة السجين
واترسهة ملح هم ما اصيحن اخ
مثل زاد الثواب انسحك بس مرتاح
تتونس ضلوعي بسحكة المدراخ
شيخ ومن وعيت كماطي جان عكال
موش انة الجديد الكثر مالة وشاخ
واذا عل طيبة تحجي بكلبي شايل هور
حتى ابن الصريفة احتار بية وداخ
انا هدومي قديمة وضاك بيهة العوز
بس بلون كلبي اتحدى كل كشاخ
نسمة وما افزز صفنة العصفور
قارن بية بلبل تلكة صوتة صراخ
بيدك ضيعتني المثلي ما تلكا
يطلع مختلف لو تاخذة استنساخ
ربيتك رغم جنت ادري بيك تروح
الكّاع شما تربي تفاركـ المحصول
ذهب حطو كبالك يا ملح يا زاد
خف رجليك واركض شغلة بيهة حجول
عمت عين الكبر واتعافة عل خريّط
وعمت عين الركض واتباها عل مشلول
شجاني وجيت يمك كل عشك ما بيك
انا اليتمت ضحكة بشفة المذلول
كبل لا يشبع اسود راسي ضاكـ الشيب
واخذتني العشاير شيبي مال فصول
عاشرتك هوة….ماتوكف بغربيل
وانة مسودن واغربل والمتن مهدول
مدري شكد سهرتك…ما سألت الليل
بس اذكر الليل هواي جان يطول
وغفيت وجان حضنك ثلج يبرد بي
واكول احساسي بارد هوة ما مسؤل
وانة احساسي صاحب فضل عل بستان
حسرتي تفوت نسمة برية المعلول
بس هية الصيبة العشكـّ مو بالكيف
ما يدري اعلى غفلة ويوكع المكتول
