محمد خشين
آنه ابن الشمس والماي وابن الكاع…..عراقي وطيبتي التثبت عراقيتي
وآنه ابن النخل عنواني رفعت راس……خل يحجيلك التاريخ عن صيتي
وكح فوك السواتر وانكلب شاجور……وبالملكه تصير عكال بيريتي
وانه عكال العرب لو مال كلهه تميل…وحكت من ثورة العشرين خاجيتي
ساعات الحرب خلكي اعله كد السيف…ويرد لمن تفض ابكبر تربيتي
اسرفن حركتي ورداني مكفوفات….اغيم عالمصايب لو صفت نيتي
للجبهه زلم زفيتهم عرسان……ملفوفه ابعلم ردت توابيتي
بجنسيتي الجبل والهور والنهرين…ثكيله بجيب ماتنشال جنسيتي
يمر اسمي وتدنك يمه قوميات…..تقره حسين والعباس قوميتي
ميهمني السجد عالتربه لو عالكاع….يهمني الدم عراقي وهاي شخصيتي
حافض روحي بس عالغيم مو عالغيب…بالاول عزتي والهيبه تاليتي
يمرون اعله بابي وياخذون مراد…..لان موسه ابن جعفر مسكني وبيتي
رادو طيحتي العاشو بخيري سنين….نسو فضلي ودماي وحجم تضحيتي
يكفيني الي شافو رايتي ايخشعون….يشيل الله واكبر عزم ساريتي
تأذن رايتي كل مايهب الريح….ويرف كلبي وتصلي بداخله امنيتي
