حسين جهيد الحافظ
1— الشاعر
شايل اِهمومه عمر
أيّامه ينثرهن غنه
اِشموع وچفافي مهر
يعصر اِبروحه الحزن
وبشفافه چلمة فرح
فيّض حنينه نهر
قافيته تطلگ ألم
والصفنه تاسع شهر
للناس جابت أمل
شايل مراود كحل
يرسم سوالف سمر
2— طبع الشاعر
طبع الشاعر طبع الجوري
ولازم ناخذ منه العبره
يمتاز الجوري ويتباهه
لو طش بين الوادم عطره
وطبع الشاعر
لازم ينشر بالحب شعره
ومنه الوادم لازم تشبع
لمن تقره
3 – عطش
عطشان اِجيت النهر
واِبچفي أمل فرحان
كل خطوه تنگل فرح
رغم الجدم تعبان
بشفافي ضحكة طفل
يرضع ثدي حلمان
طگ جرحي .. دم واِرتوه
اِلگيت النهر عطشان
