اياد الاسدي

يبو انهار  العشكً ياخيرة البلدان

كًبل تنشاف جنه اربوعك الخضرة

 اشو بور اصبحت موت اعلة طولك ليش

بعد عالصوت يفزع ياهو النطرة

طرة وكتبة تلعب تنسة ردت الموت

چاموتك كتبته وراسك اطرة

مثل اجروح تنزف دم مواضع بيك

فوس وبيد خنثة  اوليتك كثرة

 امعاند ماطحت  والطگة توجر حيل

وطن يصرخ الغوث ومحد ينصرة

 خيم عباس چفك لاوة چف النار

كلت منه الچفوف  اواگف ينحرة

وعلى اسراب اللهب رگضت نثاية تلوب

شتم بيهه العطش وگلوبهه اموجرة

مو هذي الطفوف بچفهه گضبة ارماح

العراق حسين لسة ومافزع حرة

 والك فزعت بلابل من صحت يعراگ

چي لگمت التين بشفته امغزرة

 صوبينك جهنم كلهه تومي اعليك

وياراگ اليعنزك رايح اتعبرة

 عگبوك الاجو والقبلك امن اسنين

شجاك امن الثنين وما خذت عبرة

 بمسلاتك دول تقرة وتفرزن زين

شو صارت عكس هسة احنه مانقرة

 دول كبرى ابنَاهه وشاع بيهه الصيت

ليش امن المگابر ننحسب كبرى

 ترس حضنك يتامة الدجلة يمة اصيح

ومثل لمة نوارس تنحب ابصدرة

 فقرة وداعتك زاد امنة ملحة الجوع

لون اچفوف مدت هسة مو فقرة

 وطن ينضح نفط من گصته للايتام

بس گصت السياسي الماتنث گطرة

 ويا ام شهرزاد العفة يابغداد

عرس الليل يمچ من يمر مرة

الف ليلة وية ليلة بمهدج احنه انصيح

كتلنة الشوگ بيج من الله عالفطرة

مراجيح النة متنج بي لعبنة وطاح

وفدوة الكم تگول امتوني المقصرة

يا اخت الشمس والگمر جارج چان

ونتي وية الثرية اسنين الچ عشرة

على اسوارچ لفت اضباع اشوفن سوود

والخظراء زورة ولملمت زمرة

سايسنة السياسي وگال عود ايصير 

تاني اعلة الرصيف الخير ونتظرة

اودعنة من الحچي ياثورة ياعشرين

مو شعلان ذاك شحصل ابگبرة 

مصيون الوطن چفيني شر شعلان

 ( انة جيوبي هسة (المسألة الكبرى 

 گادر بس علي وي غيري حلگك تاه

حرف وية النهب ماتگدر ادبرة

مو صوچك وحگك بية اذب الصوچ

لامرة ولامرتين لاعشرة

 راعي المشكلة وبحلمة يرعي اشياه

وأهوبصحوة نهارة وصفنته اچرة

 والزبدة اطلعت وتبدت امن ايديه

على يامال اذب الصوچ بالجرة