محسن الدخيلي
جان حامد عدنه سيد
بالطرف كلش فقير
أحميد نسميه
من كد مافقير
بس ابو محمد
رغم عوز السنين
تحطه عد يمناك هيبه
بلمة الديوان والكعده جبير
احميد من العوز………
بات ذيج الليله ابنه بلا عشه
ابغبشة العمال كام
اتحزم حزام بعباته
احميد الماطلعت عليه الشمس يوم بصلاته
كام صله بلا وضوء
ايخاف حامد
ماي وجهه يطيح
وي ماي الوضوء
وما توضه
اجرة السيارة قرضه
ودرهم رغيف الخبز
لوجاع بعد شويه قرضه
مومهم….
جيرانه كلهه تطلبه دين
وبسط بروحه حميد اعله الرصيف
وكعدت كباله السنين
وفرج الله
فرج الله واشتغل حمال حامد بالطحين
وشكك ثياب الكباره
ياكباره…؟
الساعه بالعشره الصبح
خدرت اديه وجاع حامد
من كثر ماجاع
شاف الناس
من تمشي سكاره
ومد اديه بجيوبه سكته
يشتري خبيزه كفار
ايغمس الخبزه بجكاره
اشكد قذر ذاك الزمان الجان بيه كرصة خبز
مو نعمة الله
اشكد قذر ذاك الزمان الجانت كطوف الجكاير
نعمة الله
اشكد قذر ذاك الزمان……وماعلينه
احنه حته جيوبنه بذاك الوكت
ماجانت النه
وماعلينه…….
مد اديه بجيوبه حامد
صاحت الوادم….
حرامي
صاح واحد
صاح ثاني
صاح ثالث
صاح رابع
صاح …شارع
صاحت الشرطه حرامي
وطاح حامد
وجهه طين
وظهره طين
ثيابه طين
وباكت الشرطه الطحين
باكت الشرطه الطحين
وصار ابو محمد يسمونه حرامي
وباختصار………
السيد من الضيم
قرر يعترف غصبا عليه
وقرر الحاكم وكتهه يكص اديه
اشلون بالله …؟؟
ها يسيد؟؟
اي يسيد؟؟
انته شو عدلات اديك
او اجرة السياره دين
وكرصة التاكلهه دين
اشلون من تبقه فقير ابلا ادين؟!
وقرر ايسب الحكومه
حته ما يبقه عدل وبلا ادين
وحته حامد
يوكف يسب الحكومه
صاح حامد
ياحسين
صار ابو محمد يسمونه عميل
وراح حامد مدري وين
ومات حامد
مات رميا موشتايم
مات رميا بالرصاص
وطلبوا فلوس الرصاص
ورادوا فلوس الرصاص
وحسبوا فلوسه ابسترته
تساوي طلقات القصاص
وصادروا كل شي بسترته
الجان من جيرانه قرضه
وجان رايدهه الخبزته
ومات حامد
مات وتراب الطحين من الحمل ظل اعله ظهره
وماترس بطنه رغيف
مات حامد بس ترس بطنه رصاص
شوف .. شوف
اشكد شريف
البطنه جاعت
بالجذب ما مد اديه
يبوك من ظهره رغيف
ومات حامد لاقضاء ولا قدر
أحميد عله العوز مات
احميد عله العوز صله
وغنه داخل
أحميد ياأحميد
يامصايب الله
داخل من الضيم غنه
وحسبته الوادم طرب
يلله فدوه
ابكل زمان امعلمه الفقره حطب
ابكل زمان امعلمه الفقره
تموت اعله الرصيف بلا سبب
اشكد قذر ذاك الزمان الجان ظالم
والشعب مسكين
والحاكم لهب
تبت يدا ابي لهب
تبت يدا كلمن كتب
يبقه الشعب جوعان
ومحمل ذهب
تبت يدا كلمن كتب
باسم الشعب
قررنا اعدام الشعب
تبت يدا ابي لهب
تبت يدا كلمن…
وتب
وصاحت اولايتنه اسكتوا
يمه اسكتوا
ابداعة الحبوبي اسكتوا
ونعمة الله اعله السلامه
اشكد قذر هذا الرصاص
الدفعته فلوس اليتامه
وغنه داخل
محمد بويه محمد
دير بالك عالكرامه
ديربالك
عالكرامه
