علي كاظم الصبيحاوي
ابهيده من تمشي اعله روحي
خل احذرك حيل ناعم جلدي ورقه
يلي شايل بالرمش عضة ضرس ….
لا تعاين
ولا تدوس لا تدوس
خايف بدوساتك اخدر….
وانه اكضن روحي ونشد
شلون لو حلكَي اعله حلكَلك دنكَـ ورايد يبوس
شلون يا ديرم جمالك لو لبس بدلة عروّس
يل ينكَط ماي حلكَك …كَطره كَطره
الدود من شافك اجه وشايله طوس
لا تحوس لا تحوس
خل اكَطعك وركَه وركَه…..
ولا تكَلي للمحب تهديله ورده
هوه اذا بس صوته ورده….
ادري شهديله الحديقه
من خرب دين الطقوس
اعذيبي يل شمك ينسم
وسكر بريحك هوه ايعادله كوس
وحيل ادوخ حيل ادوخ
تدري من ثوبك تنكته….
الدنيا تشهكَـ
عمي هنياله اليشوفك ….
جَنه شايف جنّة الله
ادري شيشوف اليبوسك….
يل تخدر الماي شفتك
يانعومة سالفه بكبر الشموس
يل يخدر اليل وجهك ….
والكَمر شيله ويغط روحه وينام
ويا حمام يا حمام
من تهز ايدك ترف لاخر مناره
ويوصل التغريد للعاشكَـ سلام
يا سلام يا سلام
شلون اودي شضام كَلبي….
والله كون ويوصل المضموم بيه
جا درع زيجه وطلع منه الكلام
وبيش اوصفك ….يا زليخه الكَدرت التوصل جمالك
من تحط ايدك عله الحيطان تخدر
مدري شنهي اروّيحتك من يا عمام
ايه حسنك…نور وجهك
انته يا رفعة علم بين الطوايف
ونته يا صوت المعلم من نفز كلنه بقيام
انته يا سباح كَلبي …انته يا …وكلشي انته
كون هل وادم مثل امك تخلف
جا بعد بليل ما شفنه الظلام
