يوسف الساعدي
هذا مو طبعي
احس جاي اختلف
الخشنه حتى اسوالفه،
اشبيه احجي بيه
ومن يسألوني اجاوب
حيل شفاف وترف
الدنيا اخذتني برجلهه
وتيهتني
وكمت اشوف الواكف بقلبي صلف
اليمي احس بيهم كرايب
بس ولا واحد عرف
اني ما كاتلي واحد
والله ما كاتلي واحد
خلصت كل عمري اراقب واعترف
وين ما احس بحضن جنت ارد انام
اي ليش صاحبت الذيابه!!
واني من صنف الحمام
اه لو اكدر اعيش بكيفي يوم
بيه كل خلك الجهال
وما كدرت الوحدي اكوم
مختنك محتاج واحد
يصرخ بوجهي هوه
الليل حط ايده اعله عيني
واني افكر بالضوه
ما احب الله اذا ما عنده رحمه
اشلون صاحبت الئيم!!
الما يساعد غيره يكفر
من يكول الله كريم
الشوارع تزدحم من امشي بيهه
اشبيه ما تارس كلب؟!
اشكد تناقض عندي،
اسولف بالسلام
وكل تفاصيلي حرب
اشلون احب الناس واني
منين ما ادور انضرب؟؟
عمري ما مرتني فرصه
وغيري غركو بالفرص
اوصل لحصتي ويجوني
الناس التبوك الحصص
روحي متروسه احتياج
ووين ما اركض خلص
براسي خبصه
واني اريد احجي بوضوح
بيه جم طعنه واسولف
جني ما شايل جروح
جاي احس بروحي ميت
دوريت الناس كلهه
وما لكيت الينطي روح
