صباح الهلالي
باچر انه ولوعتي
وطول الغياب
نلتم انه وياك بس اثنينّه
مانريد الزاد ونعوف الشراب
انريد بس ابليس يگعد بينّه
بكيفي باچر لاحلال ولاحرام
اثنينّه انحقق حلمنه المستحيل
ليل ونضيع بزواغير الغرام
ويانفس وياك تقنع بالقليل
باچر انته الرگبه الك وانه الحزام
وشوف ياهو الصاحبه يسلّم دخيل
مو قفل عالباب ادگ عالباب باب؟
شده والشيطان بيهه ايعينّه
هيچي نشرب ماي من ذاك السراب
وطينك الحري نخلطه بطينّه
مو هذاك الشوگ لا مرتين زاد
منك اخذ حيف حتى المو الي
شگد زرعنه وهالگرب وكت الحصاد
وهاي اليه سنين احد ابمنجلي؟؟
خاف تبطي ونارنه اتصبّح رماد
مثل ذيچ الماخذت سيد علي
من تراب الناس وترد للتراب
ليش حصة الگاع يصبح زينّه
بس تعال ابجيتك ايخف العذاب
وتدري للخطار نفرش عينّه
الطير تتلگاه الگاع شما عله
وطبع بنيادم مثل طبع الطيور
يجي يوم الشوف يصبح مشكله
رماد يبقه ومايضل عطر البخور
تهيج آلام المفاصل والكله
ويارصاصه بضهر ابو السكّر تثور
ولك لحّگ باچر يروح الشباب
تنعمي وما تنبرد سچّينّه
اليوم وكتك من ذهب باچر تراب
وهسه نگدر بس وراهه امنيلنه
گوم اخفف لوعتك واطوي العتاب
ساعه وحده انذب قهرنه اثنينّه
وما نريد الزاد ويولي الشراب
نريد بس ابليس يگعد بينّه
