جبار رشيد
كون اتشوف
عفت كلشي وجبت كلشي
ومدري شلون اجيت امشي
اجيتك ردت اكلك شوف
ردنه نعوف كلشي وماكدرنه نعوف
كون تشوف
حالي اشكد الك ملهوف
جبت كلشي اليسولف بيك
خيالي وصحوتي وطيوف
جبت دكات كلبي الكطعن كلبي
بجفاك سيوف
جبت صفنات روحي
السودنت روحي
مثل جن بمسية وعاليتيمه يحوف
كون تشوف
بشفافي الحزن ماخله بسمه تعيش
وكلمن كمت ابوسه بخدة اطبع اوف
كون تشوف
دموع الجدم مايدري وين يروح
والخطوات عمية وتايهه بﻻشوف
كون تشوف
خلصت الوجوه وشفت كل الناس
كلها وجوه غربة وﻻوجه معروف
وين الكاك يالموصوف الية
وانه الك موصوف
يالفركاك غربة وكلشي مامألوف
انه بلياك
مدري شبيه
زلف وبﻻية ترجيه
درب مابيه كل جيه
نهر فاض وتبع ميه
رجع بس مالكاله جروف
كون تشوف
