حيدر الربيعي
تعال وخل نرد صغار من الشوك
هذن جم يوم كبرنه الزعل بيهن
تعال احضاني من فركاك بردانات
اريد بحجيك اتلفلف وادفيهن
هداياك وعطورك والرسايل ذيج
اذا سالني عنك شرد احاجيهن
سواليف الاحبك والاموت عليك
اذا مو الك قابل المن احجيهن
احنه اول اثنين الزعل النه يلوك
من نزعل نعلم الناس حنيه
عدنه الزعل مابي خنجر و طعنات
بس عدنه الزعل ندلل اشويه
يمدري شلون زعلك يختلف عناس
مثلل زَعلت زلف ويريد ترجيه
زعل طفله منبوهه تريد لعابات
وشمحله الزعل بشفاف البنيه
يا جزدان امي المدري شضم بي
لكيتك بي حرز وتعلكت بيه
يمدرستي ورحلتي وكتبي المجلدات
يصحبه صدك بايامي الطفوليه
يعنكود العنب ياحلو وماتلاح
يكرصه خبز من تنور عربيه
يا لون الكصب يا ملح ماي الهور
يا حمرة خجل بخدود كرديه
زعلتك جاهل ويلعبلي ختيلان
اذا كولن حلال ترد ركض ليه
كلتلك كافي تزعل بس جنت غلطان
اتمناك تزعل هيجي يوميه
