سلوان عدنان الفضلي
يمر اسمك هوه واذكر الصارن بيك
ويرد بيه الزمان وأذكر الشبگه
وتنزل دمعتي وتزرع بروحي اظنون
واگومن ونهطر والگه السمه مدنگه
وشوغن شوغت الفاگد عزيز بليل
ونشغ والجفن يغتاظ ماطبگه
ويطگ بيه الجرح گد ما يمدني الشوف
واصبر ع الجرح واستورح الحرگه
مثل صبر الشمع لمن تعتّه النار
يسفر للبشر واطرافه محترگه
أبچي اعل المشو واضحك بوجه المات
وانه بروحي بصلافة الضحكه مختنگه
الليل بلا محب يطي النفس متعوب
وتضحك عل اليخون افضالة الشهگه
الينثر شوگ يحصد بالنده امرايات
وانه ناثر عشگ بس ماشفت ملگه
عندي افراگ وجهك جن حضن تابوت
ويحلالي الچفن چي ابيض بعشگه
النجمة اعل الگمر تتلثم بعاشور
لو شافت شمس تتعمد اتسحگه
وانته عليه واگف چن خلگ دفان
ما فكر بحالي يفكر برزگه
وادورك بالنفس واذبح بروحي بصوت
الا هل من مجيبٍ للكتل خلگه
واسمع بالحمام يرد عليه بليل
خاناك الچنت من دمعه تستنگه
عافالك جرح بي يبحر السفان
وسفينة نوح ظلت تشهد بغمگه
اليتعب بالزرع يحصد ثمر معروف
وانه زارع نخل بس مالحك عثگه
لتصدگ بعد خافن يجيك الليل
ويحچيلك حلم بي فارس التفگه
الماعايش جرح ما يدري حالي اشلون
عاجر واحبلت بس خايفه الطلگه
انه فاگد محب وبگلبي طگ بركان
معقولة القيامه تصير بالفرگه
شتدور فرح فوگ العيون تريد
فوگ عيوني غير الشيب ماتلگه
