سعود الخفاجي
بلبل واغني الك ..
اطلق سراحي الصبح لاتبقه حابسني
ثوب انه وابيض كلب
تحلم جنت بالحلم تلبس شبر مني
لابسني؟ انه اعترف
بس انت كلش حلو جي انت لابسني
يالتمشي حركة كلب ؟
نعله اعله ابوالخلفك
ليش انت جابك حلو وخلاني احبنك
من تمشي سيد هلك
بس انت سيد فلك
رحمه اعله ابيك كلت وبكلبي اسبنك
مريت كتلك امس
مولاي شوغلست
باوعلي شوف شكثر
داريت روحي بعد شلبس واعجبنك
تدري انت موبس حلو؟
انت انت كلش حلو؟
الاعمه لمن تمر
اجلال يوكف الك ويصفك لحسنك
من تمشي باقة ورد؟
بس ياورد من صدك
للجنه اروحن كبل لومره اشمنك
بس انت ماتنلزم تذبل اذا تنلزم؟
وجفوفي شوجة بحر جابيش الزمنك
ليش انت صاير لغز ؟
دوخت بيك الورد
مدري انت جنك ورد مدري الورد جنك
ماي انت من تبتسم؟
تتطشر بكل كتر تنشاف كلش سهل
واحتاربيك شكثر لوردت المنك
واتمنه لو تنرسم؟
واكبالي تكعد سنة
وبايدي ورقه وقلم وبكيفي ارسمنك
بس انت ماتنرسم ؟
مرة رسمتك حلم
عالورق واسمك رسم جاليش افز منك
انساك مرة كلت؟
بس بيك اسولف كمت
ومنين ماالتفت كدامي اشوفنك
اشفاف عندك وطن؟
جنة العراق وعلي
وبيهن اذا جلبت شتكول اعوفنك؟
وانت انت مدري شكثر من تدك باب العين
اثنين اشوفك كمت ؟
واثنينكم اعتقد
شايفكم انه كبل بس كبل يمته ووين؟
ماادري بس المهم ؟
من تمتلي الذاكرة
ومن عدهه امسح جزء بالذاكرة الكه اثنين
واحد يشبهك صدك
جنة انت طبق الاصل والثاني مدري منين
واسألني عنك كمت؟
وازهك واظل مضطرب لوردت مرة انساك
ومن انسة اتذكرك واتحلم بجيتك
وانه ادري وي الحلم بس يكظي ماالكاك
وتلكاني مااعتقد لودورت عني
بس انت لودورت عن فاقد الذاكرة
بيه اعله مثلي اعتقد تلكه شكثر مني
