محسن الموسوي
ضيعت عمري
بدرب تاليته حيرة
مستحي من سنين عمري شما اباوع عالمراية ..
وجهي من الفشلة اديرة
ودي انام وماكو بين ظلوعي حركَة
ودي اذكر شي قديم وما علي جفي اصفكَه
اتعب واجهل معادلة الزمن
ماعشت بالماضي لذة
لشنو جاي ادفع ثمن ؟
مدري ياهو يكود بيه
جني روجه
بتالي دربي .. كلشي ما الكه ويرجعني الجرف
وابقى وحدي الليل كله مكَابله عيوني السكف
بكَلبي ادور عن حبيبة وما تصح
امنيتي احب واشتاك وازعل وانجرح
فارغة بوجهي الشوارع
بطرك ضويات المدينة
وحال واحدهن مثل حالي كئيب
مدنك وعالكاع عينه
والكمر مو يمي باله
هسة ليل وملتهي بولهان اكيد
والورد من دار وجهه
يدري ما عندي حبيبة
وخاف من يموت بيدي .. ما يحسبونه شهيد
والقصايد ما تحرك بيه شي
مامش بكَلبي حنان
والصبح ماحسة يفرق عن وحشتي بليل امس
هم بعدني بلا امان
وكلهة وحشه
لا دمع خط بوجنتي
ولا جدم مر بعتبتي
واصفن ومامش ولا فكرة قصيدة من الشعر تلزم صفنتي
جني شاعر ميت بطرك القديم
ومن كَبل منتهية قصتي
وهذا وكتي
ياكَلب عدّوك كلهم
الامس والتوة جاي
بعد لا تندار اصلاً
مابقه واحد وراي
وهوَ وكتي .. من يدك دكَاتة حيرة
لا يفكني ولا يموتني بحيث
هاي صار سنين عايش واني بنفاسي الاخيرة
