رائد ابو فتيان
يامحلة ذيج أيامنه الما ترد
من جان أملنه شايلينه بجنط
واحساسك الانثوي احساسي الخشن
بمدرسة حبنه يداومن مختلط
جان المعلم يطرد المايحل
ومن ماتجاوب آنه اطيح بورط
خاطر يطردني واجيلك ركض
لويسأل اعله أسمي أجاوب غلط
الزعل عدالكبار يترك حقد
وجنة احنه أفهم من أهالي الوعي
جف الصلح منعرفه يعني شنو
تزعل وترضه بس أمد أصبعي
ومن ورة عيونك كمت أشخبط شعر
وبس عالفرح كتلي أكتب المسمعي
وجي أنته يمي جنت أكتبه الفرح
بس درت وجهك جربيته النعي
أطفال نمنه..!وأخذ حبنه الزمن
ولمن كعدنه مار بينه الكبر
وقلدت انته انسان حب بوفه
وجنت آنه أقلد اليدك بس بحبر
أكتب حروفك فوك منهن نقط
وأتمنى كدامك يصيرن خضر
وأكشخ وأجيك العصر وأضرب ركن
وبحجة ترش بابكم تنتظر
منكول عيب الناس؟جي حب صدك
مومثل هسة دغش بن بستر
وتلاكفتنه الجامعات ومشت
أنته بكتر ذبوك وآني بكتر
وذيج البراءة نمسحت من الوجه
المكياج سوه خدود وجهك صفر
كروبك بنية ومادري جم ولد
تركض وياهم ماعدت تنتظر
ولمن تعرفني صرت تنحرج
اتكلهم كرايب موحبيب الزغر…
