سيف قتيبة / الفلوجة
هذه القصيدة عبارة عن صرخة ضمير وطني عراقي إنبثقت من فلوجة العراق لتنادي ضمائر العراقيين وتدعوهم لدعم أطفال ونساء وشيوخ الفلوجة، كما تطالبهم بالوقوف مع الدم الذي يسيل في الانبار بسكاكين داعش الحاقدة..
سلاماً للشعر، ولأهله العراقيين…
رئيس التحرير
*** *** ***
تاهت بعد ما نستوعب الصار
وبعد هيهات يرجع للوطن سور
بعد نحلم نشوفك طاير وفوك
الوطن بيت الشعب خل جنحة مكسور
أزرع وردة أحسن وانفي السلاح
وخلي بالشوارع تضحك أزهور
لا تزرع فشك بأرض الفراتين
وبأغصان الحقد تنشاف شاجور
شفت دم العراق يسيل علگاع
العراق اليوم شفته بگصته مطبور
شد أيدك بأيدي وصيح جيناك
ونعم منگ اعرفك لمن تثور
وين ابن الجنوب تصيح الانبار
تقبل يا ابن عمي تعوفني بجور
اعرف غيرتك با ابن الأجاويد
وبعد جنگ هذاك الدمك يفور
تعال أفزع وياي واكسر الطوب
مثل شعلان اريدك كون ناطور
احرسني وأحرسك من الاوغاد
ومنخلي امل للتفرقة أيدور
نكسر ظهر داعش ايد بالأيد
وضربة رجل واحد نعبر السور
هلة بالجيش العراقي الحامل ديار
رحت للموت عمدة ناحر نحور
لجل شعب العراقي ينام مرتاح
نذرت الروح فدوة لأهلك أنذور
سهرت الليل طوعاً حتى الاطفال
تنعم بالامان بداخل الدور
عراقي وهيجي اعرفك غيرتك تاج
على راسي العرب تنشال مجبور
لأن رمز الحضارة البيك مولاي
وشرط كل الدول تخضعلك نحور
