حامد الشمري
رجعتونه لأيام السلم والخير
لأعياد الطفولة وذيج فرحتنه
امضعيتنه المراجيح من الثمانين
لوماعيونكم ماجان عرفتنه
المراجيح اعرفتنه اهواي مرتبكين
لزمنه احبالهن والفرحة هزتنه
دقائق حلوة جانت زغرتنه اسنين
وملت بغداد ذيج الساعة ضحكتنه
حلوجان اختيارج للمكان اهواي
موضوضاء هادئ جنه دمعتنه
وجبتي الذاكرة بدفتر ينكط احساس
ومقدمته لجنان العشك ودتنه
بخط ايدج جهنم تنقري الفردوس
وقبل ذكر المواقف بدت لذتنه
هاي انكتبت بساعة عتب وخبال
وهاي انكتبت وجنه احنه فرحانين
وهاي انكتبت وجانت النية افراك
واشرحلج عليهه وانتي ماتنسين
كلبج ينكسر من اشرح الاحداث
تبتسمين الي وبداخلج تبجين
الخواطر جامعتهن جامعه الومضات
أمنقتهن تكول اثياب المعرسين
اخذنه الوكت مانزلنه شي عالميز
وعلي مانشتهي من الفرحة شبعانين
ويبجيله أعلى صورة الموعد نحس بي
ندري اثنينه بس احنه خجلانين
اهلنه تشوفهه خاف الصور شنكول
وهمه أعلى اتصال الهسه متحلفين
