اياد الاسدي
موت بمستحاتك من يمرك غيض
وجدح نار عينك بالزعل وشتد
(لين لاتصير ويابس ويه الناس)
حدي ابهاي خلك بين حد وحد
لين تنعصر يابس تطگ مكسور
وعلم بالحديد من الصخر اجلد
يمد روحه ويسنح من تمسه النار
طبع غمان ينكض ساعة اليبرد
وخذ طبع السيوف شما تگص بالروس
تطخ روس وتبوس اجدام كل مبرد
مبرد موت اصيرن ويه كل بذات
أحد بشيمتي وموشيمتي انه انحد
ولبس ثوب بطنج لو صرت عربيد
تنفر من تريد ابطولي تتمدد
متنكر عرفتك تدبي براسين
وسفطة اوجوه كل واحد لون ينعد
ماتحمي الگفة ولاتوفي من انخاك
تدچ أذنك وصيحك وانت تتلبد
شمالك ماغزينه ولا لفتنه الخيل
حته انگول حگة بهاي يتشرد
دفت زاد وملح وتوسط الماعون
بچفوفي ويبهت ملوحته اتعمد
مايوفي بعسرنه البيسر نواخ
يمنة ومن يصير ازماط يتبعد
مو كلمن طويلة ابمتنه هذا يجيس
ووشاح الفشگ بچفوفه وتجرد
ولا چني بسلفكم من يصير ازماط
ذيب امعط اصير بزودي وتصيد
واذا ترشگ زرگهم ما ارد هيهات
أچهب من تثور ابنار ما ارتد
دنيه اشما تدور أظل ضماير ناس
واليوفي بصبحته بدمنه يتخلد
شفنه من الضماير خورساهه الموت
وشياطين التغلس بيهه تتعبد
ابلع موس چف المستحه وماگول
أغص وكتم واحس احشاي تتمرعد
وشفنه من العجايب ماحوته اعقول
بحوافر شاة ذيب شلون يتسرد
