رائد الاسدي
يلبعتني برخص ظلمك حده وين
انه الشريتك تبيع المشتريك
جنت صفنة سوك بيام الكساد
وراس حاجة ومحد ايأشر عليك
جنت ماكو
وللاكو كتلك تعال
كتلك بروحي مكانك لاتحير
شوف جرحي ؟ شكد الجمه وهوه ذاك
كتلك اتعلم وفاءه ومثله صير
ردت منك مثله تكبر يوم .. يوم
كبر آهاتي وعذب اسنيني
كمت اشوفك حيل بعيوني صغير
كثر ما صغرت الدنيه بعيني
ردتك اترد وحشتي لطول الطريق
مثل نسمه اداعب الليل بسكوت
صرت اشوفك جن درب موحش كئيب
وخلكي حيل ايضيك من يمي تفوت
لا تكول بدوني ما تكدر تعيش
هاي مشكلتك اذا رايد تموت
انه بالنسبه الي انته انتهيت
وعدنه قانون البشر مرة يموت
ولا تظن بروحتك تترك فراغ
انه اريد اغسل مكانك من تروح
لآن كلشي بداخلي باقي نظيف
وما أريد اثارك ثلوث الجروح
طردتك روحي وبعد مالك مكان
وحسمت آمرك ما بقت محتاره
روح ورجع للصفر لايك عليك
وشوف غيري هواي تلكه اصفاره
