أزهر الإزيرجاوي
من كاروك آدم…
وخدر فـَيْ تنور….. ينباك الوجه غفله
ومن ثدي الحچي المگيود
لاول عين ما زفت نذر للموت
يمد روحه الفجر مصلوب
هناك الشمس تتباهه
أذا شافت عثك خدران
هناك اسمع حجي الچتفين
من تعثر الروجة يصيح بيهه شراع
بسم الله عله گد الماي من يعثر
هنانه أنخاچ
ياروحي؟
ياتمثال أول طين
ماعزب مطر طاريه
عثرتي أنتي بذنب غربان
بين التايه وطاريچ
صوت يصيح وين فلان
كل مسجون
يحلم بالخبز مصلوب يكفر بيچ
كل مرود
گمر ضوگ الگاع انجوم لونة عليچ
لاتابوت شالچ والچفوف هواي
ولاينفعلچ تظنين
غويتي الجرف والماي الحبل روجه
ولاجنچ
ولا چن الاصابع عثرت بحنه
ماتدرين
كل جرة نفس لبليس يعثر جيل بالجنه
وماتدرين
طشرني الوكت نسمة
وجفن خيط الشمس لاحكني وين اگعد؟
وين الگه فجر
مايشرب القرآن يمه اسجد
وين الگة العتاب إذنوب ؟
ياحضن الاچيبه أشتم رصاص اغروب
ياچلمة الاودهه أتگلي فشله أتوب
ياروحي الذنب بيمن؟
الذنب
ببنادم من يعيش مدري ابنادم من يموت
أشوف الدنيا تمشي بطولهه المتعوب
يغزله التعب كاروك ويهزهه المطر لو طاح
النجم بالصحره گابل فشلة العاگول
وانه ابينهن فلاح
أدور ماي اسگي امرورة الصاحين
بلكت تصحه چلمة زين ما الگة
وأعثر چلمة بالتاريخ
وطيوفي تفز بخوف
والنجمة البعيدة تشوف كل ملگه
وگلت تگضي
وگلت كل واحد ولونه
ومطرت عالصحاري تراب
ادري الماي من ينزل بصحره
يضيع ماعونه
وتنطرت الهوه المافزت ظنونه
ونگلت الجدم فزعت آخ للمجروح
شفت نفس الذنب من تخدر متونه
ولگيت السجن من يهيم بالمسجون
من يدنه الوداع توشل عيونه
وياروحي
ولگيت بگربچ المحد
لگيت الفشله تكبر لو ضحك ملچوم
ولگيت الغيم طوله بلا خجل يكعد
ولگيت بصفنة الصاحين نوم اسود
تعبت هواي
وين أرتاح؟؟
وكت الفيض من ارتاح
كل ملچوم يتمشه ويه تابوته
وكل غيمة تريد چفوفي بس الهه
وكل عمري خلص وشوية طول الليل! اريد ابچي
اريد اتسله بعيوني
أريد اگطع تذاكر همي واتنخاك
خل تسافر الدمعة عله چفوني
وهمت وحدي
وگضت بس من گضت روحي
لگت دنيه
حوت من الگمر لونه
ومشت گد النهر دربين
وتوضت بيه وتوضيت وما ادري
بعدنة ثنينه متيهين
