سلوان المحمداوي
اول تالي هيج اشتاكـ يتالي العمر حاجيني
احب انسان حب غيري
ويذم شمس المضه بنجمات ماشافت روازيني
بالي وياه
واطلك بآه
يمشي بدمه غير انسان يتمناه
وانه نسمة حجي الشمات تاذيني
افز كل ليلة واعصر شوك مدري منين
وادبرلي خلك سكران من اسهر يسليني
واتداين ونين اكبور من اصفن يناغيني
واحضر شمر عاش وياي من فركاه بس اضحك يبجيني
العشك وانذل
يدور حل
وانه رايد ذكر طاري التيهني يدليني
يتالي العمر ذلة روحي مو هينه
شكل لربعي واثار الحجي مبينه
اذا ذكروه .. ما ادري اشيظل بالروح
اظل اظفر صبر واتوجه عاللحظات
وارسم بالسوالف اوف
واتجتف لواحد جنت دوم انخاه من يركب بروحي الخوف
بس الكارثة امن الكاه اذا زعلان
البس وجه ما معروف
وانذر للدرب خطوات بيهه جفوف
واستانس بمدري شصار
واضحك ضحكة امعزب لفو خطار
واكض مرايتي و وجهي واسمع بيهن حجايات
الافكر بي واحب طرواه هم حبني
اباله لو اتيه يوم يندلني
اذا يحتاج شي من عندي يسألني
الخجل مر بيه مو وكته
وﻻ وكت العتب وي روح شبعت ضيم
تعشك بشر بالسكته ..
اريد اكتب قصيدة ابلا هجر وافراك
واوصف الكلي احبك موت بس انته
يل طولك سفر ايوب
يمته تعوف دين المايعرف يتوب
يبو ريحة املاكه بإم لابن مفقود
بيك الشاعرية تذوب
خدك والكمر متواردات بلون
ماعرفه وحق عمري الخلص منهوب
ممكن تقره احبك .. خل اصدك بيك
كمت ما فرزن المكتوب
كافي وتوب
عوف المايلبسك بالعشك نظرات
حسنك ثوب ..
يل بايك حلات الليل والنجمات
ظلت يم هواك تلوب
وارجع بالقصيدة اتشتت الموضوع
خلص وكت الذي بابياتي وصفته
اسكرت بالماحجيته اعله الاريد اهواه
من كد ما كلامي براسي عتقته
يتالي العمر رد وياي
خل اشتم سوالف كون صدكيات
بلكي ارجع صدك لصباي
يتالي العمر ذلة روحي بيه تعيش
وضحت بس كلت للناس هذا فياي
من شحت شمس وياي
من دورت عن اهواي
وادري اليلومون هواي
مايرضون اشم هواي
كمت اشرب حجي الماجان يرضيني
وكمت ابرد بكل انسان يجويني
و وزعت السوالف ماي لاي عطشان
بلكي الكه بشر يفهم الصار وياي
اني امفرهده سنيني
هضمني البينك وبيني
اول تالي هيج اشتاك يتالي العمر حاجيني
