باسم الخاقاني
بليلتهه راهب للعشگ
ذبيت اصابيعي نذر
لهفة اعله شباچ النهد
الغــــوث يارب النده
الغوث يارب الخمر
ونعس بديه اشگد ورد
واتعانگت وي العطر…
وركضت نثايا بنشوتي
والرغبة مخموره بخصر
واتعبدت ….
گردالتك ضحكة نبي ومن التراچي للحنچ
ميلة وحي
وچان الله بيه بكل كتر
استغفرك…. بسوالفك مر الشته
اغفرلي… شوغة من الشمس
استغفرك… بيك انت برگع مستحه
وبضنوني ما مش بس عرس
كل ذنبي راهب للدفو وانت شته
بليلته ردت اسغفرك
شو غمضت !!!
مو شمًل بروحي الجفه ومسني الحزن ..
هلبت تفز
هلبت ..تراودني غطه
انا اعله نيتي ويا العشگ
يجوز احسب الشبگة حرز
والغايه ردت استغفرك
محرابك تلج فضته
والليل اغانيه كحل
وحنه وجدايل مستحه التفن على الرگبه ذنب
ابريني ذمة حنتك حتى احتفل
وطشًر حريرك لو ردت..
ما تسوه ينظم النفس …الدنيه مسه
واحنه بسرايرنه شمل
وغفرانك يلم الشمل
ثاري النده العندك وكح
الدنيه بسواد الما اجو عالبال من اتعبدت
وهو ولا چنه نده
يدور بأصابيعي صبح
هاك الضمه واطني صبح
هاك الهلا واطني اعله شفتينك (حمِد)
وانا الادبر البسملة
واحييني حتى استغفرك
والغايه ردت استغفرك
