حيدر الحمداني
تيممتك سوالف خوف
وصليتك كمر ينزف عله امتون المناير ماي
وتداينتك نفس مصلوب
من وادم كله بيهه السموم اسنين
ماشافت سراب افياي
توسمتك رهاوت شيب ودوهنت الكناطر بيك
جي شايل دفو الكيعان
سبحانه اشكثر باراك رب التين
بده اشموسنه ابنحرك
هيبت مستحه اتلكاك يالبيك الترف شطين
باهلت الفلح والكاع ماشتلو مثل خصرك
تسيورت ضمه اعله النوك
سير ياشريج الهيل تلكاني نعش متعوب
مر جم برزخ ابروحي ولا مريت
يالغنيتلك عمرين غير الماعرفهن وين
عدمن صارن الياشيب
يالهجرك سهر مغبون غث الليل والحسبه
يبلسم كل صبر مطعون
مر بيه شتال اعيون اخضرلك دمع تواب
حطني ابكل عزه ايوازيك
اساجي الفاجدات اعيون وتميز ابنصهن حيف
يالمالك عرف بالماي دخانك وصل لطيف
حجيي الوادم حجر سجيل وجفوفي نخل ثوار وعيوني ضعن ممحل
وين الكالي ريت كاع منتجيه اعله حفنه ازلوف اكول اهنا وطن روحي
بس اقنت امسامر ليل
اغبشلك مطر بي طعم ماي
اوجوه وصحالك سمار اخدود
مر بيه زعل شفتين وضحكلي ظهر مطعون اغني اشموس الولاية عرس ملجوم
وجذب اسوالف اهل الريل
وامشيلك سماي اخيول وغازل كل كمر
ماطخ جبينه لماي بس يضحك ضوه لجبريل اشهكله صلاة ابليس
واعزفله لحن تفاح
واجيبه لحضرتك سكران
وانت اعفو اعله كيفك طين
مسودن ضوه لملكاك يالرموشك مناوب ليل
برد حيله اشوكح طاريك
يندل بالظنون ايعيل
انا مغيم سهر وفياي
اريد امطرلك اجفوني ودفو اعيوني
بلجي ارهم عتب لشفاك البيهن
مدري جم زمزم تبده وذاب
البيهن يكشخ الممنوع مدت ايد
البيهن شال ياقوت النده اشراعين
البيهن للخمر تاريخ ومزاحم ضحك نعسان
البيهن ما لكه النواب يم سجت حمد محراب يسجدلك بنفسج ريل
مرني بكل جرح يرضيك نجمة ليش
ماتلكه ابسمه روحي
دمر بيه الجرح مريود لشايل مثل هجرك
