محمد الغريب
عكس دوري
بكل ناعور دار الماي
وانه تراب گام
يهيل ناعوري
وكل عصفور عله وطار
وانه بنص قفص
مسجون عصفوري
وكل شبچه تصيد الحوت
وانه بشبچتي
ما يحصل الزوري
وكلمن حصل الراده
وانه من الطلايب يبس حنجوري
وكلمن شرب چايه وراح
وانه اعله الوجاغ مثلج القوري
وكل ناطور عين الذيب ……
ماتغفه
وانه العصر
كام يغفي ناطوري
وكل بذره صفت شجرة
صفت بستان….
وانه وحيد هاي الناس
يبست ماتت بذوري
عكس دوري .عكس دوري .عكس دوري
عكس دوري
ناعور اليهيل اتراب
حمل جمر ناعوري
ولايگدر لحمل الضيم
طگ ومات عصفوري
ومتحمله حيايه ماي
شبجه الجابت الزوري
گصب ومشرگ من الدوس
من كثر المصايب صار حنجوري
ورحمة الله على ماي البارد وافيش ….
متخسف لگيته
ومايع القوري…
وزين وچان بس ينام ….؟
تخورس ونطرش ونعمة ناطوري.
عرس مدلل وچانت يبويه ايامنه حلوة.
عكس دوري.عكس دوري.عكس دوري
عكس دوري
ماظل شي أخاف عليه
وبكيفچ عكس دوري
ستر الله على الجمرات
ظل عودان ناعوري
وطلعت ريحته ولا حيل بيه الدفن عصفوري
وردت شبچتي من الماي
لا حيه ولا زوري
ومن عوزي أعله ابو الفافون
بعته وما بقه القوري
وما ظل عازه للناطور
أشعندي ويظل ناطوري
صابر وانتي التعبين
مطلعيني من طوري
وشما أسرع اتفرين اكللچ…………
عكس دوري.
عكس دوري .
عكس دوري
