عمار الساعدي
شتسوين هسه أدموع لو ضحكات تفكرين بغرامي بغيري فكرتي
ينساه الكلب كلمن بعد عالعين خايف بالمثل هذا أنتي امنتي
الامثال تضرب ما أظن تنقاس وانتي أشلون خاف أعله المثل قستي
جف موادعج حسيته حبل أعدام وأول ماوصل للركبة نفذتي
ولكيتج أقوة مني اتأكدت من هاي متت ساعتهه أنا وأنتي قاومتي
بجيت أسنين عمري أنه بئر خطواج وأنتي أحزان فرحة أخلافي دمعتي
من يوم المشيتي أعيوني مقفولات تضم رسمج أخاف أتضيع قافلتي
من أكلب بالصور كل نظرة روحي أتموت أشكد ميت لعد من يوم مارحتي
أمد أيدي أعلة خد الصورة من أشتاك وأجرهه أبلا شعور أتخيال أخجلتي
أبكل جرة نفس ذكراج بيه أيعيش وعشتي أبيت غيري أبيتي ماعشتي
شربت أسنين هجرج ورتويت أجروح اوياي أشكد كريمة أجروح عزبتي
أكسر خاطر الليل اليمر بجفاج علي نجمات دمع من عرف قصتي
أنة أمجوي الكلب عن لايحب أبيوم خلك ماعندي أكلب حتى ذاكرتي
كافي بخيري شري وراضي بالحسرات وكاضي أسنيني كلهه العيشة سالفتي
وين أنه ومحبتج ليه جانت وين طلعتي أمنين أليه ودستي خارطتي
أنه النسمات تعجز من حدودي أتفوت على عرش الكلب من يادرب فتي
شفتي أكليبي ظنج رأية أستسلام ودخلتي أبكل برود بروحي وأمني
وأخذتي أسنيني كلهه أبلا وصل لا باج باجر من أعوفة أشلون ماكلتي
سرعة أحتلالج دخلت التاريخ على جيوش الكلب من نظرة سيطرتي
مثل رفة عيوني أبيوم ودعناج أحتلالج ونسحابج يوم غادرتي
صوت أجفاج بذني وكلمة الله أوياك ماكلتيهه بالله يرحمه ودعتي
