صباح الهلالي
يحسدوني عليك المادرو بيه
جرف حاضن الجاري وماحضه بميه
يرد چف ايدي خالي وضلعي كصه الروج
والناعور يغرف بيك ليليه
احرس للصبح عن لا تبوگك عين
وتفك الباب بيدك للحرامية
مو كلمن حلو من تعاشره يوافيك
يمكن مو حلو وما مقتنع بيه
مرات العسل للناس سم يصير
والحنظل دوه والنار حنيه
شوف انته بجمالك ياهو اليجاريك
وشوف شلون كلبك كلب زهديه
ضعيف انه اعترف وضلوعي محسوبات
بس واضح وياك وصافيه النيه
صحيح انه اهلي فقره وثوبي شگه العوز
بس وداعتك چن املك الدنيه
اختاريتك اهل من دون كل الناس
وك ياهو الگدر يختار اهاليه
لو كلمن عشگ ناعم اتهنه وياه
عفتك من زمان ورافگت حيه
جذع ميت وانطرك روح وين تروح
الشمس لازم تجيبك تگعد ابفيه
