محمد خشين
الدمع ميخلي كحله تبات بالعين..
وانه كحله وعلي سالت دنيتي
بحربهه وياي سر الليل مفضوح..
وخذت من يمي چتفي وبندقيتي
الضحك ميطيحلي بس دمعي اليطيح..
تشم عاشور من تسمع بچيتي
يباچر لا تجيني بداعت اليوم..
ظل هناك اريد اكتب وصيتي
يربعي بدمي مدري وياي تمشون؟.
اوصيكم اذا حانت منيتي
اليدور جيوبي لازم يحسب حساب..
غير جناح مايلگه بهويتي
بقطعتي غطو كون انسان بردان..
فقير وبلوته تشبه بليتي
وفولي طلب ذيج الدكاكين..
الخذت منهن جگاير تچوي ريتي
واعتذرولي حيل من العصافير..
لان مابي غصن واشجار بيتي
ورده وعشت گوه بدون بستان..
واحس خنگتني كلش مزهريتي
مدري شلون ملتمات بالروح..
اليسمع بيه يحتار بقضيتي
كلب مطلوب ثار وراس سكران..
وچتف جناز شايلني وضحيتي
بصباي وراسي احسن شيب مطلوب..
بعد ما كامله وشابت لحيتي
ناس العاشرت ستر الله عالذيب..
شلتهم وانه ماشايل خطيتي
