احمد الذهبي
زايد علعشگ ماعندي حيلة وياك
واحجيها وصدگ لو رايد احچيها
وانته اتحايلت وانه ادري بس مااﮔول
ماتعبر علي بس انه اعديها
وادري اتضم علي بس اقتنع ماضام
تتخربط اعذارك وانه اصفيها
فوك اشفايفك كل الحقيقة اتموت
وبعينك اقراها وعيني تمحيها
ترس روحي العتب والزعل والحسبات
المها بغيبتك بالملگه ابديها
وردت اخفي العشگ بس نعمة الله الشوگ
وبيها اشكال شرعي النعمه نخفيها
حبك شمس بيه وماكسرها الليل
جيب اثنعش ليل وماتغطيها
وحبي بداخلك شمعة بسجن بي ناس
نفخة بحسرة أي مسجون تطفيها
وميخالف ﮔلت شمرة عصا وارتاح
شمرة عمر طلعت لازم امشيها
المشاعر شيبت والعشگ يرجع شاب
وياخذها على حبك بيها مابيها
مااحبك واﮔلك چنت احبك لا
چنت اشتم نفس كل خطوة تمشيها
وما ابوس التراب التمشي بي رجليك
كل ذرة انه ابوس اتراب رجليها
شگالولك بجالك دمعة وانته بعيد
عبالك صدك شتظن اسويها
كل لحظه ابغيابك ابچي عشر سنين
احط اسنيني دمعة بعيني وابچيها
شما اريد اخفي سري واقفل البيبان
ومفتاح القفل والرزة اوصيها
تتلثم صفنتي وتسطي علصندوك
ويفيض الدمع واسراري يحچيها
ليش اتگول رايح انته وينك جاي
لتكلب الجروح وسكته خليها
گلبي بنص عقل خايف اخباله ايزيد
وخاف يشيل روحي الغيري ينطيها
ولتگول انتهت تقراها بالمكلوب ؟
اقراهه امن الاول حتى تبديها
ماشايف محب قصة غرام وشوك
ماباديها بعده يريد ينهيها
