الله عوضني بمحب بعدك جديد
غزوان الغالبي
الله عوضني بمحب بعدك جديد
ما يفارگني الطبع كلش مرح
يضحك بوجه السجاجين التجيه
يعني بعدك الله عوضني جرح
مايشبهك عكسك بكل الصفات
بكلشي عكسك بليصح والمايصح
انت وكت المغرب وعفت الحبيب
وهوه يبدي المغرب الحد الصبح
انت ماتخجل لون تسمع كلام
وهوه مو يخجل فقط لا ينفضح
انه فاتحلك ذراعي وصدري جان
هوه للملكه فقط من ينفح
ليش وحشي اتصير في وقت اللقاء
ومن احضنك واحضن السانك رمح
لا تظن ابعدك اتهزني الرياح
الجبل ضده الريح بس يبقه صرح
وانه قمة الجبل وشرايد تصير
هم درب مسحوك لو صرت السفح
بيه ميزة بحر ومتاز بهدوء
ومن يغثني الموج اتحول وكح
غلطة حبك ..
ميثم فالح
غلطة حبك … تسوه كل صح بالوجود
و بيه من عندك وجع … جن عافيه
الصدك ما ارتاحلك … بس روحي بيك
و ما احبك … بس احب مـو كافــيه
وانتَ مو فد شي … كَلب بين الضـلوع
و مو ضوه عيوني … و بدونك طافيه
ادري شحجيلك و تزعل … حتى امـوت
نار احـس بحضـنتك … بـس دافـيه
ما اريـدك كوه … من دونك اضـيع
و ما احتاجلك … بس اريدن صورتك
انت بالنسبة الـي تدري شتكون
مثل هيج بداخلي مالك شريك
انت بس غمض عيونك انه اكون
و بس تفتحهن ضوه العينك اجيك
انـت بعيـوني ثمر صـعب المنـال
و عيني خيط من الشمس و التف عليك
لا تضوجك اول ابياتي شحجيت
شاعر مسودن شعر ظل يحجي بيك
بيك ومو بغيرك بالي مشغول
علي رشم
بيــك ومـو بغيرك بالي مشغـول
حبيبي الخاطري لـو سافرت گول
انتظرت طـيوف ليلك
نفـس مرني دخيلك
انازع والحنيــن ابروحي مشتول
غير تـگول رايح حتى اودعك
ذكرتك والعمر كل ضحكة دمعة
يل مثل الهوى ويا الناس طبعك
من اشوفن صورتك صوتك اسمعه
غريـبة الـروح چنـهه
العطش غافي بجفنهه
علي يكصر الليل وهـجـرك يـطول
حبيبي اشتاگلك هم مثلي تشتاك
دمع فـوك الجفـن ينـبض حنـينـي
ثـكيلة اشواگـي جنها ايـام الافـراگ
على گد الـبعد بـينك وبـيني
فراغـك مارحمني
تعال وبيك ضمني
علـي يا نفس يرهم واني مكتول
لونك مـاتـغير..بـعده نفسه
شنو اخبارك حبيبي اشلون الاحوال
كلشي البيك باقي ابروحي احسه
ظـلت يم دمـعتك راحـة البـال
يمك كلشي دافـي
المسية تـمر عوافي
شگلك والعذر عند الله مقبول
