ميثاق الهلالي

يلمني الليل…

ساعة وتنفتح بيبان الولاية

واسيّر عالبلابل كلمن بعشّه

 الدمع بيّه ..ملح روحي

الحچي العندي ندى وتستاهله الغبشه…

 انه اتلگــيت شمس الله بروازيني وطحت فوگــ المدينة افياي..

انه مراية بنات الهور

يطلع من ظهرهه البردي وطيور الگــصب والماي..

 اطير بگــذلة الحلوات

أنه مرايه….

الم احلام المعرسين وانثرهن على گــد الصريفه يطلعن ولاية..

انه صوت اليموت وتندفن بجنازته حچايه..

 المضايف لونهن مني ..

السلف عطشان بس لو مطرت الدنيه ..

التراب يطير وي كل گــطرة فختاية

 وحگــ مرورة الگــهوه تمرني حچاية التذبح واعبرهه

مضيف اجواد بايام الثگــال وبابه ماسدّه

أنه اليمشي خضار المستحه بروحه

ولافد يوم جفّل خاطر الگــعده…

خذاني الليل وانه اتعذر من الناس

لومامستحه عيوني وحگــ الله… چا حطيت كلمن طينته بخده ..

 شلي بيهه النوايا السود؟! مومثل الكحل بعيون الحديثات

ذيچ تبيعني بچلمه وعذر وفراگــ

وهاي تطشني ضحكه بوجه الولايات..

 اريد البس صباح الله ..واريدن واحد متيّه يدليني!!

ترى عندي دمع ماشايلاته عيون

اريدن واحد مسودن يبچيني ..

ويفهّمني الوطن يمته بگــصيبة عاشگــه نظفره؟

 اريدن وطن ياخذني..

ويطشّرني سوالف ماي ..فوگــ جروفنه السمره

يمر بحايط سنيني يدوّر هلبت مراية وضحك عرسان

هلبت تركض الديرة بشلبها وتگــعد الرعيان..

 يالماشي لهذاك الطيف ماوصّيك..

گــله ولايتك عطشت خضار وماي 

وانت بعيد ..

صبخة ولايمرهه الغيم

بيهه وجوه تاكلهه الشمس وتخضّر الهه افياي

 دلّيني بسوالفهه الترد الروح اريد احضن صدور الگــاع

وانه وياك

احس الهور يتّچه اعله برديّه

لوين تريد؟؟لا تعله

ترى شماعلت شمس الله تطيح من الصبح للگــاع ترچيّه

 امس دگــ بابي طيفك والعطش بالروح

ضحكت ليلتي وطگــ الحلم بستان..

مُر كلشي بلهاتي يصير

حتّه حروف المعاتب يتيهنّي بسمه عيونك..

يباب العيد لاتلبس هدوم الليل

نفنوف الصبح تستاهله متونك