حسين القاصد
الله يساعدك خوية هسة الساعة خمسة ونص وانت كَاطع الشارع ، والوادم عدها دوام بعد خالك !! ـ ارجع اخي .. اليوم حظر تجوال !! خوية والعباس ماكو حظر تجول واني اخوك اعلامي واكاديمي ورايح للداوم ، وأدري راح تكَول اليوم عطلة .. اي خوية عطلة بس في بغداد واني اداوم خارج بغداد ولذلك طالع من وكت !! ـ لاتتفلسف براسي لااكاديمي ولا اعلامي ، انت تعلمني بشغلي ؟؟ مو أكلك حظر تجول !! زين خوية بلا زحمة اكَدر احجي وي الضابط ؟؟ ـ لا ، الضابط تعبان ونايم . زين خوية راح انزل واتمشى للنقطة الثانية واذا لكَيت بيها ضابط واقتنع اليوم مو حظر تجول تخليني افوت ؟؟ ـ ولو اني مقتنع راح يكَول حظر تجول بس روح بس خلصني !! انعم الله عليك …… السلام عليكم ، همزين لكَيتك سيادة الرائد ، لأن المراتب مايمتلكون قرار وانت اكيد تقدر الوضع ، سيادة الرائد اني دوامي خارج بغداد وهذا الشرطي مال ذيج النقطة يكول حظر تجول اليوم !! ـ تسمح لي بهويتك ؟ نعم ، تفضل . روح جيب سيارتك من ذيج النقطة وتفضل روح لدوامك ماكو حظر تجول !! شكرا لك سيادة الرائد .. بس هذا الشرطي .. العفو المنتسب .. كلش موش خوش !!
