حسين القاصد

المرافق كثيرة ومضكورة هواي بالكتب ، واهم هاي المرافق هي المرافق السياحية ، والسياحة معناها نروح لكردستان ، ونتجول في المرافق السياحية ، ونطمئن على الماي لايكَطعونه اخوتنا الاكراد .. حتى لو ننطيهم الموازنة كلها بس لايكطعون الماي لأن هم عدهم جيش ومدري شنهي !! المهم وهذا الجيش مالهم ايضا فيه مرافق عسكرية مهمة ، والظاهر كل شي له مرافق ، والعراق من 2003 يحاول يجفف منابع الارهاب حتى يستقر الامن في كل مرافق البلاد .. وحتى تنتعش المرافق لابد من الصيانة والبناء المستمر وهذا البناء مايتم بدون ميزانية والميزانية ماتتم بدون مايكطعون الماي !! والوادم حايرة ، كلش حايرة ، ناس تريد تحجي بس تستحي خاف يصير مؤتمر اربيل ثاني ويصير احراج !! ماعلينا بالوادم ، يكولون رعد حمودي فاز بالولاية الثالثة بدون تظاهرات ولاتعطيل بالموازنة ، ويكولون ابو تيسير (فلاح حسن )  هذا اللي  رجله بمنزلة حلكَـ صدام حسين .. لأن سعدون جابر بوكتها غنى ( يا ابو رجل الذهب يافنان الشعب .. العب وناول .. ) بعدين صارت ( يا ابو حجي الذهب يامحبوب العرب  مدري يانبراس العرب .. ما اتضكرها زين ) المهم ابو تيسير فاز نائب لرئيس اللجنة الاولمبية ، وراح تزدهر المرافق الرياضية لأن اللي فازوا اصلاء واصحاب هم وطني .. اي بوية ، خلاصة السالفة : كل المرافق مهمة وكلها تفيد ، لاسيما المرافق الصحية .. بس مرافق واحد يخوّف ويشكل خطر على العراق !! وهو المرافق الاقدم !! لابو حتى عبد حمود !!