حسين القاصد

    الاعمى مضكور هواي بالكتب ، والعربان مال كَبل يستحون ويسمون الاعمى بصير ، وكَبل جان الاعمى صدك بصير ، يعني اعمى مثل بشار بن برد يشوف اكثر من كل البرلمانيين السابقين واللاحقين  الى يوم الدين ، ولا يهون ابو العلاء المعري !! ضكرتني سالفة ابو العلاء باستاذ بكلية الاداب عنده دكتوراه عن طريق الحزب يسمي المعري ( المتعري ) ، ماعلينا بالوادم ، اللهم اجعلها غيبة ، يكولون صاحب الحاجة اعمى ، بينما الحاجة هي ام الاختراع شلون ترضى تصاحب واحد اعمى !! هم ماعلينا بالوادم ، لأن التجربة اثبتت ان صاحب الحاجة ( اثول ) وحتى الحب مو شرط يكون اعمى نوبات يكون الحب اثول مثل حب ( الحليوة والطنطل ) اقصد (الحسناء والوحش) بلا تشابيه !! هم ماعلينا بالوادم ، اهم شي لحد يفتهمني صح لأنه ما على المرشح من حرج ، واكو مرشح ماخلى مكان مارشح روحه له ، واخر شي رشح نفسه للبرلمان ، وبدلا من ان يتفقد احوال الرعية !! ويسألهم عن احوالهم مثل الاستاذ بهاء الاعرجي ـ ايضا بلا تشابيه ـ شو هذا الزلمة صاحبنه اتصل بي بعد يومين من انتهاء مجلس عزاء والدتي ، كنت اظن انه يريد يعزيني ، وقد يكون سمع مؤخرا ويريد الاعتذار ، بس تفاجأت كلش ، جا غير سألني عن تحشيدي انا وعشيرتي لحملته الانتخابية !! لا يا اثول (طوووخ ) على هالسالفة الغمة هاي .. يكولون كَبل اكو عمى اسود وعمى ابيض ، بس اول مرة بتاريخ العراق يتوفر لدينا عمى انتخابي !!