حسين القاصد
من المضكورات بالكتب بيضة الديك ، وهاي يجيبونه كمثال للمستحيل !! بس اكو ناس مطلوبين نذر ونريد نذبح ديج ، وراح الزلمة للسوكَـ واشترى ديج ، ومثل كل مرة ، الوادم دائما تسأل ام الدجاج لأن هي اكثر خبرة، تسألها هذا ديج لو دجاجة ، وترى على مسؤوليتج ، وانتي والله .. اذا طلعت دجاجة !! وهلم (جري !! ) ، المهم، الزلمة اشترى الديج واتفقوا على انه ديج وكان يعوعي وشحلاته !! ومحد يشكك بفحولته ، وصل للبيت ـ السالفة حقيقية والعباس ـ وذبحوا الديج ولكَوو بداخله بيضتين !! ، شكد فشله ؟؟ ديوجة مال تالي وكت !! اني دخلت بالسالفة ورحت ابحث بالكَوكل فوجدت ((الديكـ ليس لديه قدرة بيولوجيًا على أن يبيض , كونه ذكرًا ,الدجاجة هي ما يبيض ..لكن ما قد يحدث أن فيروسًا معينًا قد يصيب الديكـ ؛ فيتحول إلى دجاجة , أو العكس أن تتحول الدجاجة إلى ديكـ ,و بعض هذه الديوكـ المتحوّلة إلى دجاج بالفعل قد تضع بيضًا !
و أحيانًا قد يتمّ العثور على بيضة مشوّهة الشكل تسمى (بيضة الديكـ) , في الحقيقة هي بيضة وضعتها دجاجة لكنها لم تكتمل كما يجب ,
بالطبع , في النهاية يبقى واقع الحال كما هو بأنّ الديكـ الذكر لا يبيض , و أن إناث الدجاج هي ما يبيض ..)) ..
هسة دخت كلش بالسالفة ؟؟ يعني هذا الديج مادام يبيض ليش مااستغل الفرصة ورشح عالكوتا حتى يصعد للبرلمان بسهولة !!
