حسين القاصد
الدودة مضكورة هواي بالكتب ، واكو دود مفيد ، وجنه صغار علمونه بالابتدائية ان نتعلم التوفير من الدودة ، شكد عيب !! يكولون الدود يحب الحلاه ودائما يتجمع على الاشياء الحلوة ، لذلك اي شي حلو لازم يتجمع عليه الدود !! لاتفتهموني صح عفية !! يكَولون : اكو واحد انكسرت يده وراح للطبيب ، الطبيب كتب له وصفة دواء مال دود ، وسأله المريض شنو علاقة دواء الدود بكسر اليد ، فجاوبه الطبيب ، حتى تتوب وتموت الدودة اللي توازيك عالسوالف الموزينة وبعد ماتسوي وكاحة وتنكسر يدك !! بس لا افتهمتوني صح !! المهم هالايام طالعة دودة جديدة اسمها الدودة الانتخابية ، وهاي الدودة هالايام انتشرت هواي ، مثلا يجي المرشح ابو دودة ، وبكل صلافة يكول اني بريء من سرقة الطائرة الماليزية ! لو يجي مدير حملة مال مرشح شايل مسدس ويشلع اللافتة مال مرشح المسكين ويخلي لافتة مال المرشح الحلو !! ، السالفة الغمة كلش هي ان اغلب المرشحين هم من النواب المستعملين سابقا ، يعني الشين التعرفه احسن من الدود الماتعرفه !! بس شو ذولة النواب كلهم مرشحين وكلهم يريدون التغيير !! جا انتم الكم حق تغيرون الوادم والوادم مالها حق تغيركم .. ماعلينا بالوادم ، يكولون هالسنة المرشحين اعدادهم مضاعفة ويكولون اكثر من الناخبين !! واغلبهم حلوين ، بس ياترى الدود يكفي !! لاتكول سمسم الا تلهم !! الله يرحم احد الاحبة .. كان يسمي من يحوم حوله النمل بـ (النملكي ) !! لشدة جماله ، ولحظوته وكثرة التصويت له .
