حسين القاصد

كلمة (ما ادري ) مضكورة هواي بالكتب ، والعرب جانت تكول : من قال لا ادري فقد افتى ، واكو بيت شعر يكول: 

      ان كنت لاتدري فتلك مصيبة 

                            وان كنت تدري فالمصيبة اعظم 

 والمايدري مو عيب ، بس كون يبقى بعيد عن الموضوع ومايتدخل ، والسالفة بيها رباط ، يعني اكو واحد كلما يسألونه عن اي شي يكول : ما ادري ، بس شو فجأة طلع بالفضائيات ويسولف بالارقام ، ويكول كذا مبلغ مدري وين راح وفلوس الميزانية تطشرت ، ومدري شنهي !! 

 جا خوش ، بوية مادام كمت تدري اني هسة اريد انتخبك ، بس كبل ما انتخبك لازم ترجع الرواتب كلها اللي استلمتها ولا تكول ما ادري شلون استلمتها ، جا انت بعد عمك ، بس تدري بسوالف الفساد مال غيرك ، والسرقات مال غيرك ، يعني رواتبك حلال لو حرام ؟ بعد عمك باقي تقريبا عشرة ايام للانتخابات ، تكدر تداين لو تعتمد على الممول الرئيسي مالتك وترجع فلوس الشعب حتى ننتخبك مادام كمت تدري !! لأن ما معقولة انتخبك حتى ماتداوم مرة ثانية وتستلم رواتب مرة ثانية وانت هم ماتدري !! يعني معقولة انت جنت تاخذ راتب وانت ماتدري ؟؟ موش خوش .. جا احتمال يسوولك غير سالفة وانت ماتدري ( لحد يفتهمني صح عفية ) .. 

  لا هيجي ماكو شي .. بس على الاقل جان خليت مذيع يقدم دعايتك الانتخابية مو تقدمها انت بنفسك ، والعباس مصيبة .. بس لا تصير رئيس وزراء وانت ماتدري !!