حسين الحاير

يلعفتني اتوسل ابخيط الفجر ..
زيارة الميت الك بيهه اجر …
اندفنت اباصبع وزاد المكان …
شلي بالاربع اصابع والشبر …
او داعتك ما اطلب اسباب الغياب …
روحي اغشمهه واصدك اي عذر …
الغرك بلماي بس رايد جفوف ..
ما يهم جف امه او جف الغدر …
بيك افكر والشماته اتكلي جوز …
اني ادري اشجابهم وسط الفكر …
رخصت روحي وغله ابعيني البلاش ..
واني جنت النظرة اقيمهه ابسعر …
الصورة ما تكدر تسد مجرى الدموع …
مرلي يلوجهك كشخ بيه العصر …
مرلي لو حته سهم جيتك تصير …
بيك ارحب وانكلب كلي ظهر …
ياهو كلك ماكتب شي عالغياب ..؟
هاك من عندي اخذ ذني الصور ..
روحي شمعه اشلون تتحده النهار …
زرع هجرك فات مرحلة الجمر …
المفارك خنجر ايشوف الهلال …
العينه ترمد حقه يطعن بلكَمر ..
الفزة حصته العاش كل عمره ابخيال …
الغصن لو مات شيضره الكسر ..؟
الدمعه كلمه ايكولهه السان الضمير ..
رغم تعبه ابساع ينذب الكشر ..
جسمي خف وشاله بيت العنكبوت ..
اشباقي بيه ايفيد خاطر انتحر …
يلعشت بيه عمر بيك ارد اعيش ..
ورايد امحي ابجيتك احساس الاسر …
فدوة جاوبني الك نيه تعود …
عمري مايسوه وظل بيك انتظر ..
هذا حالي ومنك اتمنه الجواب …
والجوابك ياترف ناذر عمر …….