علي سلمان غالي

لا تفك باب الدمع بالگوه سديته
گلبي وأعرفه شمع
الآي بيت من ينوجع يتبرع ابيته
گدامي اشوفك ندى
وعمرك بعد مابدى
واتگلي أدور شغل واتكلي انه مضطر
ابيادين وابيا شرع
انت يجبرك وضع
تنزع هدوم الورد وأتصير شوكت بر
(وينك ووين الشغل وكت الشغل بعده
لو يستحي هالزمن
لو عنده ذرت حيه جا شغلك وردة)
وينك ووين الشغل ياجنح فراشة
ماتدري جنحك حلم وابلمسة يتلاشه
درب الشغل مو سهل
درب الشغل صحره
خوف وظلام وقهر
والخطوة بي عثرة
وبي بشر بس مو بشر
افواه ما تشتهي اله لحم فقره
انت مكانك اهل بيت وحضن دافي
بس انت خصمك زمن والزمن متعافي
ذبك بحلگ التعب
ذبك بحلگ النار
بين البجي والبجي وايگلك انت اختار
فلسفت هذا الزمن بس هو يعرفهه
واحد يسوي ملك
تسجده حته هله
وواحد يهلكه هلك حته اهل ما اله
يوليدي گلبي ترف دمرته بدموعك
ودمع البعيني سهل سكتلي اضلوعك
خذني الخطوتك جسر وخذني الحمل نهر بس خوفي لا انكسر
واحد انه بهالدرب والمثلك انت هواي
ديرة وغزاهه العطش والنهر مابي ماي
بعيونك انت دمع بس مو دمع لا دمه
لمهه بوسط راحتك دگ بيهة باب السمه
گله الاه البشر
سد باب محرابك
وانت يرب البشر
كل السمه بابك
افتحلي حزمت ضوه خل تغسل أيامي
بلكي تموت الحزن وتكبر أحلامي
(تعبني هذا الوكت حملني حمل أجبال
انه بعمر ال١٢ بس برگبتي اعيال
ما عشت عمر الطفل رأسا صرت رجال)
ورجال بس من ورق متشوفه عين الناس
العين حدهه الگشر شعليهه بالإحساس