حيدر كشمر

محبوبي ماكو برقته
ومحتار كلي بشبكته
ﻻ ينباس ﻻ ينكمش
الهوى شتجني بكمشته
وهو الهوى
والحلوه امس
من حلكي ﻻمس شفته
توني ابوسنه ردت
وبس جسته طاح بركبته
ومحبوبي ماكو بطيبته
مسودن عقل اذن السمع
وبايك عيون الشافه
يمشي كلب فوك اﻻرض
بكل خطوه يخنكله نبض
وما تفض موت انصابه
مدري شنو كلش حلو
من اوصافه تبجي اوصافه
ارهم جذب وياه
وأبد ما اسوى كلشي خلافه
عفته ورحت وبنفس هاللحضه
عطش حلكي عشك
ومن ارجعت لرويحته الشفافه
تدرون منه شحصلت
من حلكي حلكه الدفي
شربني حد كطع النفس
مو بس عشك
شربني حتى شفافه
ومحبوبي ماكو بعشرته
وما ينوصف خط شوكه
جلد بخت ما الوم جف
الفصلك كل جلده اليه علوكه
كلش حلو مدري شنو جالماي
ابد ماله طعم وشما اضوكه
جن مااضوكه
نخله وعكس طعم النخل
محمل رطب بوسه
وما يعتذر من اشتهي
جوا جنت لو فوكه
ومحبوبي شفاف بشكل
حيله مثل عجنت صفر
بجفوفه كلشي ينفتل
ﻻ ينمل وﻻ ينحمل
ومن انسال عنه اشكثر انت حلو
بكل راس دوخه ينشتل .