حسام الحمزاوي

كدرت البالي اعليك كلها اطوال.
صفنتي ومستحاي وكلمتي الوحده.
وين اتريد احطك ولو ذنبك ريش.
ذنبك مو صعب بس انه مو كده.
بركبتي المو وفي مااشيله ذمة شوف.
ﻻن باجر دمع ميشيلني بخده.
ولتكلي السهر رمش اعيوني اعليك.
بكثر مابيها وادم عينك مرمده.
اشما اباوع ابوجهك بي معاني اوداع.
ولو هو القطار اشترجه من عنده .
امبين ماتحب وجه اليحب متعوب.
من الوان البوجهك واضحة اﻻخده.
عافيتك امورده ابجال هذا وذاك.
وعافية الخيانه ابجالك امورده.
جمالك والغرور وطولك الشبرين.
ينهبن اذا ماكلبك اتسده.
السجن تلكاه درب لو راخي كلب الباب.
ترخص هيبته بالروحه والرده.
المخفف زليخه ثكل يوزرسيف.
لو بي خفه يوسف ثوبه من قده.
وانت ابخفتك بصمات شك اكلوب.
طبع شيطان طبعك للذنب حده.
اشكد تصرف اكلوب لخاطر العباس.
ماشايف عشك ياهو اليجي اتوده.
ماعندك صدك بس ضحكتك عالناس.
من افعالك الوادم كارهة الورده.
اليطب ابدرب نيتك شمس كون ايشيل.
ظلمه وكلب وحشي ابنيتك امكعده.
وانه ابنيتي اتحط النوارس سود.
مو قصة مدح بس الفرق نده.
لزمتك بيدي ماي وانه عوزي احزام.
كلي ابروح ابوك الماي شيشده.
صح حبيت اعاشر بس اعاشر بير.
غير اسراري فارغ كلشي ماعنده.
وانه عفتك ﻻن محتاج راحة بال.
وانت العاشرك بس التعب جده.
مو جفي اليصافح ذنب مامستور.
غيري هواي مثلك للذنب جده.