ميثم.الرماحي

عطشانه روحه لهوسة المدرسة
بعيونه دكات الجرس تنقره
مشتاك اجاهم والهوى ويا مشه
ودفتر الخطه ونوري والمسطره
وزع بيوت عالاطفال شكثر
وماملك غير الستره والمنذره
نيته وكفه الطبشور نفس الوجه
كتبن حروف شكثر للاخره
الشعبة عنده شلون غار النبي
وجان الحمام مأمن بدفتره
شكد عالي صوته ومامخوف طفل
والبلبل الفتان ما طيًره
متميز الشوغات من ضحكته
هيج التقاعد كاسر بخاطره
من اهل الله مايبرد بجيبه الفلس
ولابات عنده الراتب ودثره
من بعد فركه لصف الأول أجه
وشيباته ضافن واهس لمظهره
وجاهل اجه من بعيد شابع قهر
زعلان جان يكعده بآخر سره
من شافه مد ايده ولزمهه بعطش
لزمة زند عباس للكنطره
واتحاضنوا ماي وي جربة عشك
والزعل راح منين ؟ مايندره
كله ان اعرف بيك كاصد الي
ذاكر مكاني وراجع تغيره
غيرته بعدك من مشيت ورحت
عشرة خذت بس روحي المصفره
استاذ والعباس من ارحلت
الرحل صارن مو رحل مكبره
من اكف عالصبوره احس بوجع
حسراتي مثل اقلامي المكسره
اذكر سوالف بيك ماتنسي
بوكت الحصار اليشبه الآخره
من جان عدنة الخبز بس للحلف
ونركض على التنور نستغفره
قاطك شريته براتب ونص عمر
وغيرك بعرسه القاط ومأجره
وعندك طبع لو مره جيبك فرغ
تضحك بوجه القاري والماقره
استاد ليش عيونك مدوهنه
رد النه واكطع واهس المنذره
رد النه موش هواي طول العمر
وراوس عمرنه بعمرك وكاسره
شمحلاتها اللوحظ المنك تجي
جن غده الزهره ويمها نلزم سره