ميثاق الهلالي

دليني بشواطينك يبو النعناع
يل بيك الكرنفل يعبر الصوبين
والغبشة ومسيت زلوف
شفتك من خذانة الليل
ضميت الكمر مابين
صدرك واستحة النفنوف
لا تشتاكلي من بعيد
بس حط روحك بروحي
اذا ماجيبلك حتة الصبح زافوف
خلينة بطرف ليلك ولو نجمه
مشت بية الدروب جروح
وانت بعيد
ما ميز كمت مابين
برد العافية من حرورة اللجمة
ولا نسمة التدك الباب
امس مرني الهوة من بعيد واتعدة
حلاة الموت وانت وياي
مايدري الندة من يموت
ماطولة بحضن ورده
وحك الحنطة البروحك الم جم بيدر بروحي
وسوالف ناس مملوحة
اخذ كلشي التريدة وياك
مبيوك العشك ماينحسب مبيوك
مادامة بطرك روحة
ترة ضميت كل سوالفك بالراس
واسرارك الماي بروحي اغطيهة
وهاي سنين وانه الخاطرك عطشان
حلفني اذا بديت كطرة وسولفت بيهة
واقراني سوالف عود يعزفني طفل شاعر
قضيتة وياك مرة تخيب مرة تخيب
مدري شمالني بلياك
يتكسر بريجي الماي من تغيب
مدري شمالني وماحاسبلهة حساب
كمت اتسودن من اشتاك
عود البارحة كلت امرك طيف
بس شلون وانه بهل ثلث
 تيام طير وكسر جنحة فراك
ماظل شي علة حالة من الدمع لليوم
ضحكاتي. النجوم.الشارع البستان
مدري شمالني مدوهن واسولف بيك
وادم زرعت وحصدت ولاكت خير
وانة افلاحتي الدخان
من ذبلت شواطيك مشة
 بروحي النخل جناز
واشتاكيتلك تابوت
لاتنسة
ترة الفلاح من يموت زرعة يموت
وصارت بيك سالفتي
اسولف بعدك ويامن
يبو خلك النهر لو فاض
والودام خلك هيمة
مهو اليكصي العطش وياه
سالفتة شحجت وشكالت الغيمة
من هد ماصار عندك راي عني تروح
وانه ليومك بلا راي
ماوصيك
خاف تصيرلك قسمة
 وتبدلني بوجه ثاني
ترة مو كل وجه بي ماي
فرزنهم
تصح وادم كصب مرات
بس مايصح بيهم ناي