حسام الخفاجي
حيدر بالشغل بس باله يم البيت
عاف ام حسن مايعرف  شبيهه
كلش ماله واهس يشتغل بس كال
اليتامه التدك بابي الصبح شنطيهه
كال بدربي اشرب چاي يم سلمان
ويم سلمان كل حسراتي ابديهه
وامر واكنس الجامع واستثاب اليوم
وحته الموعليه ابالي اصليهه
ومشه يصلي عگب ماشرب چايه وگام
وخم السانه ماكو احچايه يحچيهه
صد عالقبله ربي ..بداعت الزهراء
مريضه ومالي غيرك وين اوديهه
ونده سلمان… گله أأمرني يامولاي
عندي وياك شغله بيك تگضيهه؟
ماعندك طبيب انطيه صلاة الليل
ويردلي ام حسن چن كلشي مابيهه
ماعندك علگ بس كون مامشدود
اشد راس ام حسن وتكف بواجيهه
ومشوا مشية مئيس راجع بلا راي
گله امشينه خل زينب نواسيهه
وسمع حيدر دبيچ رموش بت جواد
تريد تفك جفنهه وحيل مابيهه
ولن صوت الحسن بويه الحگلنه بساع
امي تخربطت متلحگ اعليهه
وركض خطوه اله والثانيه لسلمان
ووصل للبيت وانفاسه بتواليهه
ها علويه خير.. شبيج شتهيسين
يگول الحسن امي مدري شبيهه
علويه اعله بختج بيج اشد احزام
ظهري والتجيني بواهس الويهه
يالمصلايتج مفروشه طول اليوم
يعني انوب اصدهه وخاليه الگيهه؟
گالتله علي…. زينب امانه وياك
كلشي تسوي زينب لا تحاجيهه
هاي مدلله وتانيهه فگد اخوان
بداعة قنبر ابنك لا تبچيهه
وكلش غمضت واتلاشت الزهراء
وبيهم بينت حوبة بواچيهه