غفار الجعيفري

زينب اجيتج شايل بطولي اوداع
وطبع الوداع بدمع لو هلهوله
اعرف دمعتج غاليه ولا تبجين
رايح احط للماي ماي ابطوله
واوكف سبيل وانطي للسيف عيون
حتى يجد فرق الكفوف الاوله
ماهمني توكع جربتي وبيهه الماي
عندي المهم بخاطرج مشيوله
ادري بكلامج تارس الرايه جفوف
الزمهه اهدهه ثنينهن محموله
باجر يجون الدرو بالخيمه عيال
بس مادروا بالخيمه اخت مكفوله
بس صيحي باسمي وانه افزع تاريخ
واكتب خبر عنهم كصص مجهوله
زينب اوداعج يفرق هواي وياي
فرق الخيام الطافيه ومشعوله
واحجيلي زينب لان ناطرني الماي
ياخويه شحجي ورايتك معدوله
هاي انه اجيتك شايله بطولي خيام
اوداعك يضيع واهس الهلهوله
وترجعلي ادري وصدك بس خالي جفوف
ذمه بايدينه الجاسهن مشكوله
طولك كمر وياك يرتاح الليل
تبقى الشمس بالشمس بي مشتوله
عباس كلي شرايك شلون ارتاح
اعرف جوابك ماكو داعي تكوله
لازم ادور مطلع اي حته ارثيك
او مطلع الكه الشام دربه شطوله