باقر كامل

الملم روحي يفلانه
وأصير الخاطرج ورده
وأصير لخاطرج شامه
وأصير الخاطرج ( يفلانه ) خزامه
والبسيني شحلاة الكاع ..
لولبست وردها ولو تباهت بيهه
احضنيني …
احضنيني ..
شحلاة السيف لويحضن جرح راعيهه
ولج يفلانه عد عينج
والج يفلانه طشيني
رماد .. وحنظل .. وخرنوب
طشيني ..
وتلكيني ..
أجيج بضحكة الجاهل حضن حالوب
واعشب ….. لو نشف بشفافج الحالوب
……………………………… واذوب
وارد انشدج ياتوالي الروح !!..
لوذاب اليحب العشك هم يذوب
اشحلات العشك الما يجفل من الموت
اشحلات اليوكف بوجه الدهر ويفوت
وحك عينج .. وحك عينج
وحك اعيون المسافر
وحك حس الربابة اليجبر الخاطر
لدكن دكه.. مادكها كبلي بنادم بعمره
……………. واصير لخاطرج كمره
واجيب من الشمس يحبيبه الج حمره
وخلي الصوت عند الوادم الوادم
بخناجر طيب .. واحد كتل لوامه
واصير الخاطرج وردة
واصير الخاطرج شامه
واصير الخاطرج يفلانه خزامه
تنيت !! وارد اردود …….. أو مامش
تمنيت ..!! وصاحت الوادم ولك مامش
صبرت .. والصبر سد باب الفرج
وكلت ميخالف : اليحب يتحارش بالدهر حرشه
وعين الحلفت عله الليل .. عيب اتغمض الغبشه
واحس .. !! …….. يالبعيده بروحي حنيه
………………………………….. ولاجيه !!
ولاحته برفيف النوم ألمعت يفلانه ترجيه
اروح وياج يفلانه لعد سابع سمه من الظيم
………………………………. اروحن غيم
انكط عالورد لونزفت جروحه ..
وغرك كل المحبين
واشك زيجي وصيحن حيل ..
واصرخ بنص الطوايف ..
انه اصرخ :
أوداعة الله وياك يالعايف رفيجك
………………………..يارفيجي .
وداعة الله وياك يمضيع طريجك
………………………ياطريجي
وشنهو وردة ؟
وشنهو شامه ؟
وشنهو خزامه يخايب !
اليحب مره يتعلم .. شلون يلكاله حبايب