حسن السيد عاجل

من زغري عليه مرادف النكبات
وطكًات الزمان يضيع بيها العــَــدْ
متعود عليهن والتفوت اتهون
لأن أدري الوراهه إتصير منها أزيــَـدْ
فصٌلت الحزن ثوب ولبسته إسنين
لا يقبل أذبه ولا قـبل يركَــــَـدْ
وحملني الزمان إجروح فوكً جروح
وجروح الزمان إشلون تتضـــمٌـدْ
وأضحك والسوالف موش جنها أوياي
مابـّين خلل للناس متعـــــــمد
او من أدري برفيجي يريد بيه يعيل
بعتابه الخجل ياخذني وأتردد
ولافطره وسذاجه وموش تايه راي
لجن طبعي التسامح وي كل أحــٌــد
ولاعمري بنيته إبدغش وي الناس
ومن أبني العلاقه أبنيها حل وشـّـــد
ولاعمري جفيت إبعشرة الطيبين
ولا عمري بديت ابقًـطع حبل الــــود
أنسّف بالربع وأوزنهم بميزان
وموكل الضحك وياي بيه أضمـــَـدْ
أسايرهم حياء وأدري ما يوفون
لمس بيدي لمست ومنّه متأكـــــدْ
جثيرات السوالف والمجال يضيج
وموضوع الأفتحه أدريبه ما ينســـَد
أكره كل منافق يحجي بالوجهين
يضحك للجبيل وهو قلبــه اســـود
وأحبن هالوطن وترابه والطيبين
ودعليه بصلاتي من اركع واسجـــِد