علي عبد الواحد

كل طلعة شمس جم نجمه كلي تموت
وكل غيبة شمس يحتضر جم خيال
كل نسمه التمر جم وركه صفره اطيح
وعلى وهم الحياة اتصير شاهد حال
كلشي بدنيتي ايذكر بشكل الموت
كلشي اكبالي يرسم للمنايا اشكال
((كره شكل الكلايد والد المعدوم
جي عالركاب ادور جنها احبال))
لدني الفرح ماعدنه شي وياه
ولاتحرج سماي وتحط بيها هلال
غضيت الطرف عن كلشي جابه العيد
وبدلت الاثكال من الحمل بثكال
وغطيت الجرح بجروحي انه مجبور
بشليف التعب يستر حدبت الحمال
انه وتسالني عني وياجواب اتريد
انه الماعشت عمري احجايت التنكال
انه استحسف اللحظه التخط عالروح
واحزن على انفاسي وهيه راس المال
هضيمه العمر يكضي بوهم عازف ناي
كعد يترجه دمعه بوجنة التمثال
نتنافس عليمن روح اخذ شتريد
واشبع يالطموحك صار شهره ومال
ولتكلي الوصل من وكت هوه يفوز
باطل ياقياسك هذا كله اشكال
الماي اشكد صعب يرتفع بالناعور
بس اشكد سهل من ينجفي بشلال
وعر درب الحقيقه وصعب لليمشي
وسلس درب الوهم لليمشي بستعجال
وموكلشي انتفخ من كاعه صرح ايصير
ولاكلشي انثلم معناها صار اطلال
ولو قسنه الجبل كون بنظر عملاق
تره بعين النمل كوم الاحجار اجبال
كون من الكلب للشفه درب بعيد
يطولن بالمشي الكلمات كون اثكال
((المواهب ..والمبادئ للمجد رجلين
واذا ضيعنه وحده اشلون يمشي الحال
اليمشي بتك رجل يبقه بمكانه يدور
عمر يحلم بخطوه ومامشه الفرجال))
وشعر من غير مبدئ شعر مابي روح
مثل سرد المواعض من حلك دجال
وتعاتبني القلم ماكتب غير ((حسين))
حكك ماضكت حرك الخيم بالبال
انه التنسبي ايامي الكل سنه للشام
انه الجرح اسنين السوط والاغلال
هل من ناصر ليهسه بيه تعيش
واحس حسين يهمسلي بلسان الحال
اذا لعيال الفاتك تنتصر بالسيف
تره بحرب المبادئ بعد عندي اعيال