بارق العاشقي

يمكن مو بشر — يمكن ملاك ايمان
شارد من سمانه — وواحد امعبره
لئن جوه الشعر والجتف شفت اجناح
وريش ابيض وكع من مشطو شعره
بخدوده الفلح زرعوله بستانين
وبطارف الركبه انشتلت الخضره
اذا يحجي دعاء ولو ضحك تجويد
تخشع لو حجه وتختنك بلعبره
اسنونه جن ضريح اشفايفه الشباج
ما بين الشفايف والحلك حضره
(((غسلته بمي ورد شريته نص الليل
ما يحمل شمس شريته علكمره)))
واذا بلجنه جان وادم ايلاكي
لا تفاحه راد ولا وصل شجره
من كد ما حلو تتنخه بيه الناس
ويشمرون جفيته اعله المعسره
وهذيج الشككت يوسف قميص ابدار
من فات ابدربهه وشمشمت عطره
مو بس القميص اكضه وشك بي
جا شكت قميصه وشككت ظهره