علي الكناني

ياراحه التصح وسنيني كلها دروب
ويا نوم اليمر عالمنوخذ حكه
بيه من الزمن جم وسفه وجم حيف
من أشرب نهر ماتبرد الحركه
اشكد جف الفقر شد ابركبتي احبال
ولا أبين ضعف واتحمل الخنكه
أبيعن خنجري وماابيعن السجين
للخطار تفزع صاحبة ملكه
أصفه من الشمس خام الكرم تلكاه
واثياب البخل ماتلبس الخركه
راهم عالمراجل هذا وجه السيف
ورهمت عالدمغ ماتستحي الدركه
ماعليت صوتي ابعز علاة الصوت
أدري من السوالف تفحط التفكه
انه احجاية ورد لو كلت اريد الماي
توكفلي المساحي ورووسها امدنكه!
ماتعب اجفوفه ابخزرته الكصاب
تصطك الذبيحه وطولها اتدكه
بالهاون أبد كل حبه ماخليت
هضيمه الهيل يدة هاون اتسحكه
لاتبرد يجدمي الردته هم ينشاف
دشد احزام همتك صدك اتلحكه
اشما يمشي الرمل عينه اعله وجه الغيم
بس تنزل المطره ابمايها اتشبكه
يافرحة جذع تطلع فسايل بيه
وياحزن النخل لوما ضكت عثكه
اذا ماتت الدله اتيتم الفنجان
لأن كضت عمرها ابخيرها اتغركه
دمعه اكبال دمعه اوزن ابميزان
أثكل دمعه تطلع دمعة الفركه