ازهر كريم

من كاروك ادم… وخدر في تنور….. ينباك الوجه غفله
ومن ثدي الحجي المگيود لاول عين مازفت نذر للموت
يمد روحة الفجر مصلوب!
هناك الشمس تتباهة اذا شافت عثك خدران
هناك اسمع حجي الجتفين من تعثر الروجة يصيح بيهة شراع
بسم الله اعلة گد الماي من يعثر
هنانة انخاج
ياروحي؟
ياتمثال أول طين
ماعزب مطر طاريه
عثرتي انتي بذنب غربان!!
بين التايه وطاريج صوت يصيح وين فلان
كل مسجون يحلم بالخبز مصلوب يكفر بيج
كل مرود كمر ضوگ الگاع انجوم لونة عليج
لاتابوت شالج والجفوف هواي
ولاينفعلج تضنين
غويتي الجرف والماي الحبل روجة
ولاجنج!!
ولاجن الاصابع عثرت بحنه
ماتدرين !!
كل جرة نفس لبليس يعثر جيل بالجنة
وماتدرين
طشرني الوكت نسمة وجفن خيط الشمس لاحكني وين اكعد؟
وين الگه فجر مايشرب القرآن يمه اسجد
وين الگة العتاب اذنوب
ياحضن الاجهبه اشتم رصاص اغروب!
ياجلمة الاودهة اتكلي فشله اتوب!
ياروحي الذنب بيمن؟
الذنب
ببن ادم من يعيش؟؟ مدري ابن ادم من يموت؟
أشوف الدنيا تمشي بطولهة المتعوب
يغزلهة التعب كاروك ويهزهة المطر لو طاح
النجم بالصحرة گابل فشلة العاگول
وانا ابينهن فلاح!
أدور ماي ازگي امرورة الصاحين
بلكت تصحة جلمت زين ما الگة
واعثر جلمة بالتاريخ
وطيوفي تفز بخوف
والنجمة البعيدة تشوف كل ملگة
وگلت تگضي…..
وكلت كل واحد ولونة
ومطرت عالصحاري تراب!! ادري الماي من ينزل بصحرة يضيع ماعونة.
وتنطرت الهوه المافزت ضنونة
ونگلت الجدم فزعت آخ للمجروح!!
شفت نفس الذنب من تثگل متونة
ولگيت السجن من يهيم بالمسجون من يدنه الوداع توشل عيونة
وياروحي……
ولگيت بگربج المحد
لگيت الفشله تكبر لو ضحك ملجوم!!
ولگيت الغيم طولة بلا خجل يكعد
ولگيت بصفنة الصاحين نوم اسود
تعبت هواي
وين ارتاح؟؟
وكت الفيض من ارتاح
كل ملجوم يتمشه وية تابوته
وكل غيمة تريد جفوفي بس الهة
وكل عمري خلص وشوية طول الليل! اريد ابجي
اريد اتسله بعيوني
أريد اگطع تذاكر همي وتنخاك
خل تسافر الدمعة على جفوني
وهمت وحدي….
وگضت بس من كضت روحي
لگت دنيا
حوت من الگمر لونة
ومشت گد النهر دربين
وتوضت بية وتوضيت وما ادري
بعدنة ثنينة متيهين ؟؟؟……